【海外追星】四日三夜泰國快閃之旅：YOASOBI演唱會

買唔到超人氣日本二人唱作天團YOASOBI香港場飛既小編，係2024年年尾見到Klook重有得買曼谷場既演唱會飛，就決定黎一場快閃曼谷追星之旅✨

📆 行程重點

👍 推薦

第一日 – 曼谷市區探索🦈🛍️

落機已經係曼谷時間02:00，原本以為受KK園事件影響會小好多旅客去泰國，點知排隊等入境既人龍都係好長好長，最後用左差唔多1小時先入到境。
據我哋觀察，機場既保安明顯加強左，時不時會見到有警察巡邏，安全起見我哋都盡快CALL GRAB去酒店。
今次住既酒店叫做FuramaXclusive Sukhumvit Hotel，位置係Nana Plaza同Phloen Chit既中間，搭BTS同叫車都十分方便。

梳洗完就爭取時間休息一陣等天光，訓醒起身第一站就去咗紅大哥水門雞飯(總店)食早餐，呢度嘅雞飯真係無得頂，肉質嫩滑，飯粒鬆軟，配上特製嘅辣醬，係我哋每次去泰國必食嘅美食。食飽之後就去SEA LIFE Bangkok Ocean World。
呢個水族館唔算超級大，但足夠你玩大半日，特別係帶埋小朋友嚟，每日有唔同既表演或者餵食，部份重有職員講解。最令人驚喜嘅係珊瑚隧道同大鯊魚展示，感覺就好似置身於海底世界。

參觀完水族館，夜晚我哋去咗行新開嘅One Bangkok商場，呢度唔單止有時尚嘅購物體驗，仲有好多美食選擇，從日式料理到泰式街頭小食應有盡有，為我哋第一日畫上完美句號。

第二日 – 探索曼谷周邊🚄🌊

我哋參加咗Klook提供嘅一日團，呢次係美功鐵道市場+丹嫩莎朵水上市場一日團。首先，我哋去咗丹嫩莎朵水上市場，乘坐小船穿梭於水道上，欣賞泰國傳統生活同享用地道小食。呢度嘅水上市場充滿咗獨特嘅文化氣息，每個攤檔都有佢獨特嘅小食同手工藝品，真係值得一去。
之後就係附近餐廳食午餐同著泰服，食飽就出發去美功鐵道市場，呢度特色係火車會直接穿過市場，體驗咗當地人點樣喺火車經過之前迅速移動攤位，真係好刺激。市場裡面擺滿咗各種新鮮果蔬、小食同本地特產，買嘢同食嘢嘅同時仲可以感受下火車經過時嘅緊張感。

第三日 – YOASOBI演唱會🎶

終於等到YOASOBI的演唱會，現場氣氛好熱烈，雖然語言唔通，但音樂無國界，所有觀眾都沉醉於YOASOBI的音樂世界。燈光效果、舞台設計同現場互動都係一絕，YOASOBI嘅音樂帶領我哋進入一個充滿幻想同激情嘅空間，真係難忘嘅體驗。

第四日 – 回程✈️

雖然只係短短四日三夜，但呢次曼谷之旅真係充滿咗驚喜同新鮮感，回程時心中充滿咗滿足感同不捨。

機票HK$ 1366
酒店HK$ 868.47
演唱會飛HK$ 902
曼谷暹羅海洋世界門票HK$ 225
美功鐵道市場＆丹嫩莎朵水上市場HK$ 138
Total💵 (每人)HK$ 3499.47

,